فوق الدمع/بقلم الشاعر عمار يزبك
😔😔
فوق الدمع......
ناطر غفا... وعم أحلم بلحظة غفا
جوعان قلبي للدفا!!..... وين الدفا
كانون ساكن تلج بشرايين
و القلب ينده سافروا الحلوين
دقات قلبي تاهِت و ما عاد قلبي يَعرفا
روحي غريبة و العُمر ماضي
ذكرىٰ ألم........ للعُمر زوادة
و الفرح صار مهاجَر و هربان
و وراق تطوي صفحة النسيان
همومك يا قلبي.. كيف بدي أوصفا
طَل الربيع و زهرهن ما بان
و الشوق سافر و الحلم غرقان
و الروح صارت تسأل و تبكي
و النبض فوق الدمع عم يشكي
وين السعادة؟ و كيف بدي أقطفا
أحفر وجع يا هجر فينا و زيد
سرقت الفرح ما ضل صبح و عيد
عم ننطرن عَ دروب منسية
عليها وجع ترحال..... يومية
دقة قلب.. يا قلب باقي تنزفا
دقات قلبي تاهت،،،
و ما عاد قلبي يعرفا
تعليقات
إرسال تعليق