الشاعر محمد غبن. ( بقينا تايهين )
( بقينا تايهين )
بقينا تايهين عن بعضنا
وعن بيتنا الكبير
وقتلنا بإيدينا حبنا لبعض
ومات من جوانا الضمير
وإن جينا نتكلم مع حد
بتلاقي الرد جاهز والتبرير
وشويه شويه بينتهي
من جوانا لبعض الخير
انا فاكر زمان وقت الصغر
كانت موجوده الشهامه
كانت اساسيه في طباعنا
وكانت لينا عنوان وعلامه
جايه من ربنا فى قلبنا بس
نفوسنا اللى مريضه عدمانه
الكل يلا نفسي وقلوبنا
صبحت جشعه وطمعانه
والكفن ملهش جيوب ومش
هنحصد ساعتها إلا الندامه
اللي طايل فينا يمد إيده
فى قلب أخوه هيمدها بجحود
يقتل فيه نبضه مش مهم
إنه يعيش او يسيبه للصمود
مستكتر عليه شقاه في حياته
عايز يمنحه كمان لقب مفقود
وهي دي طباعنا كلنا مش
هنعفي نفسنا كل لبعض ظلمه
عايشين فى غشاوه لدنيا
خداعه وجوا أنفاقها الضلمه
ومش هنحصد ساعة الحساب
غير الندم والخوف والدمعه
وقتها هيكون ضاع كل شيء
ومفيش سماح وقتها ولا رجعه
يلا وبلاش إستنطاع خلونا
نرجع لبعض أحسن مانبقي ظلمه
بقلمى/ الشاعر محمد غبن
شاعر آل غبن
23/4/2020
تعليقات
إرسال تعليق