حالتي في العيد/بقلم:أ.مستور الحارثي

الأكاديمية السورية الدولية للثقافة والعلوم

حالتي في العيد

العيـــد   ياقلــب   ليـتـك  ما تَحَرّيْتهْ

في العيد حالي على الرحمن  مَشْكاتهْ

ياعيد   وين    الذي   بالقلب    حبيته

وين  الذي   كان  يسعدني   بهمساتهْ

لوجيت ابُوصِفْ حبيبَ الروح مااوْفَيتهْ

تعجز   جميع  المعاني  عن   وصوفاته

الشمس  تخجل  لِيَا   طلّتْ  على  بيته

ويغار   ورد  الهَدا    من حُمرة   اشْفاتهْ

نظرت     للبدر   في     ليْلَهْ     وجاريته

وقلت   خِلّي     تغيظك    كل     ميزاته

واثْبَتّْ    للبدر   يوم   اني     تحدّيتــــه

خلي هو الشمس  وحْدودي     مداراته

خلي  بقلبـــه  مساري     ما تعديتـــه

وهو  علــى  خارطةْ   قلبــي   مساراته

حبه على الراس انا   شلته  وحطّيتـــه

تـــاجٍ بكلّ   الغلا   زيّنْــت  شُرْفــاتــه

حبٍّ   فريدْ  ابْسما   العشاقْ    علّيتــه

حبٍّ  مَلا   الكونْ   فاضتْ   به  مجَرّاته

أبَعْلنــه  للملا   من  بَعْـد  اسرّيـــتــه

وازوِّدِ   العاشقيــن  ابْبَصْمةِ   اثْبــاتـه

قلبي   على   شان   حب الزين  صَفّيْته

من  كل  حبٍّ   قديم   ومن     علاقاته

تطير    بالقلب  من   شوقي    عفاريته

واطوي   المسافات   حبٍّ في ملاقاته

لو كان  خِلِّي  فيَ اقصى  الكونْ  وافيته

يهونْ  دَرْبه  ولــو  طالتْ   مسافاتـــه

أمشي   لخلٍّ   يردّ  الروح   لا   جيـــته

أموت واحيـــا بنظراتـــه  وبسماتـــه

كم   يوم   لاقاني   الغالي   ولاقيتــــه

وكم  ليل  ياماسهرت  ارقب صباحاته

وكم   دمع   عن  خلي اخفيته وداريته

وكم   مَرَّه   العين  تعجز  عن  مداراته

دمعةْ   فرَحْ   كل   ما شفته   وضميته

وشَمَّيتْ   طيبه   على شالهْ   وغطواته

ودمعةْ   فرحْ  لا اتّصلْ   فيني  وناجيته

ودمعةْ   حُزُنْ  في غيابه  وقت  زعلاته

وكم   ونةٍ   جرّْ من   قلبه   وهدَّيــتـــه

ومَسحْت دمعةْ  حُزُنْ من فوقْ وجناته

والعيد   يا كم   مع   الغالي    تمنَّيتـــه

واشاركهْ    في   ليالي    العيد    فرْحاته

لكن    خسارهْ    حبيبي   اللي    ترجّيته

نوى   يضحّي   وكنت   اوّلْ   ضحيّاتــه

ياحسرةَ    القلب    عيدي    ماتهنّيتـــه

يوم  ان  كلٍ   تعالتْ   فيه   ضحكاتـــه

هذا   الذي  مـــا  تخيّلْتــه وظنّيـــتــه

في العيد  يبخـــل  حبيبي  باتصالاتـــه

ياما   اختلفنا وصافاني   وصافيـــتـــه

والكل   ينسى   خطـــا خلــه وزلّاتــــه

واليوم   ياعيد   لا شفتهْ   ولا   اوْحَيْتــه

تعطّل   ارسال   خلي   من    محطاتــه

كم  يوم  رقمهْ    من  الجوال   دقّيــته

لا ردّ   خلي   ولا  جتْــنـي     رسالاتـــه

ياليت     يسمع   ونيني    يوم   جَرّيْتــه

والقلب    معتلّْ   من   كثرةْ      مناداته

كني    يتيمٍ  فقد    حضنِ    امّه  المَيْته

لا حان   موعدْ   رضاعهْ  زاد    صرخاته

ياعيـــد   بالله    لا   زرتــهْ   ومرّيـــتــه

قل  لهْ    حبيبك   يبلِّغ   لكْ    تحيّاتـــه

عيدك   مبارك   عليك   اسمهْ  وتوقيته

يعود  لك    وانت   في   صحة  بخيراته

قل   له   ترى   صاحبَكْ بالهجرْ   عنّيْته

ياليت   قلبكْ   يِحَسِّسْك   ابْمعاناتـــه

ياليت    ترجع    تضمِّدْ    جرحٍ   ادميته

وانت  الطبيب   الذي  يشفي  جراحاته

صاحبْكْ   زادت   جروحهْ  بَعْد  جافيته

واشوفْ   موتهْ  بدتْ     تظهرْ   علاماته

لو  ما   رحمتهْ   وهوْ.  حيٍّ   وواسيتــه

بالله   لا مات   وش   تنفعْ    مواساتــه

لا جاك   علمهْ   ودمع   العين    هلّيته

وش   ينفعهْ   لا بِكَيتْ   ابْيوم    مَعْزاته

ياعيد  قلْ   لهْ   تراني.  قَبْلْ   وصَّيتـــه

لا ضمَّني    قبريَ   الضيِّق    وظلْماتــه

يرشّْ    قبري   بطيبٍ   فيهْ    شَمّيْتـــه

ويفردْ   على   تربتهْ من بعض   طَرْحاته

قل   لهْ   لوِانّهْ  نساني   ما   تناسيتـــه

هُوْ   نبضْ   قلبي   وشريانه   ودقاتـــه

حتى   لو   الموت   من  هجرهْ  تقهويته

غلاه   في   القلب   يسوا   كل    نبضاته

ياليت    يرجع    حبيب   الروح    ياليته

واسخِّرِ    النفس   في   حبهْ   ومرضاته

ويكون   عيدي   ليا    شفتهْ     وحيَّيْته

واغسل   غبارَ   الحُزُنْ  من نهر    جنّاته

وانسى  زمانٍ    شديدَ   الحُزْنْ  قاسيته

واعيش   باقي    حياتي    رهن  اشاراته

ياليت   في  الجن   عندي  وَلْد عفريته

يجيب   لي  صاحبي    لا قلت  لهْ هاته

ضاقت   بيَ  الارض   لَيْن  الصبر ملّيته

والقلب   مِعْلنْ   حدادهْ   عن  مسرّاته

ياالله    يامحيِيَ   الانسان    وامْمِيــتـه

تردّ    لي   صاحبي    من   بَعْد   غَيباته